「就當一時倦了」
Patreon: https://www.patreon.com/posts/35217214
Medium:
https://medium.com/…/%E5%B0%B1%E7%95%B6%E4%B8%80%E6%99%82%E…
//
2020 年 3 月。一個明明只得 31 日，但係好似三個月咁漫長嘅月份。
俗語話，快活不知時日過。咁掉返轉諗，如果覺得渡日如年，係咪代表生活過得好苦？我又唔覺得係咁。至少，而家嘅日子，唔太難過。
令人感覺時間過得緩慢，蟻躝咁撚樣嘅，應該係每日重重複複，一鳩二樣嘅新聞。
今日朋友喺 Facebook 出 post ，係一幅 meme 圖，話 2019 年最壞嘅消息，都只不過係 “The Game of Thrones” 大結局而已。何況我根本冇煲劇嘅習慣。又，我唔覺得 2019 年最衰嘅新聞係呢單。但，一葉知秋， I just get it.
- - -
2020 年，唔知係咪應咗車公所言，瘟疫橫行，民不聊生。如果時間可以回帶到 1 月份，我諗，其中一樣要做嘅嘢係將 MPF 轉晒做保本基金。
But so sorry ，即使係傳統概念上比較穩健、低風險嘅 fixed income funds 都可以兩個月內唔見咗 10% 。雖則相比起跌咗三四成嘅股票基金嚟講，唔算得啲乜，但係揸得債券或者低風險基金嘅人，就係唔想承受咁大波幅。
偏偏，一個武漢肺炎打到嚟，成個金融市場冚包散。美國傳統大型股票如波音都可以由歷史高位暴跌七成，而香港嘅匯豐亦悲壯地唔見咗近三份一市值。
當市場自 2011 年歐債危機及美國信用評級被調低之後一路順風， Yield enchancement 玩無可玩之際，大自然嘅力量同大家講，物極必反。整個繁華景象，原來係他媽的脆弱不堪，一旦要 unwind 所有追求收益而作出嘅衍生工具交易，就出現返昔日金融海嘯人踩人嘅慘況。
- - -
金融市場如是，香港嘅零售、旅遊、飲食行業，其實亦復如是。 2003 年「沙士」百業蕭條，多得大陸自遊行打救，香港嘅藥房同珠寶行開到成行成市，近年玩港式茶餐廳嘅情懷就一街都係冰室。
情況就好似食藥、飲酒或者食煙、吸毒咁，食馴咗，咪越玩越大囉。冇得玩，咪發爛渣、反枱、開拖囉。大家都有眼見。
2020 年，武漢肺炎肆虐。香港嘅感染數字由原先領先世界各地，變成遠遠落後於歐美列強，到近日又隨住回港潮配搭做 gym 及落老蘭交叉感染而出現第二波升勢。問心，我睇到冇眼睇，就好似賴叔個 icon 咁， #FacePalm 。
有咩好睇？大家明知香港特區政府凡事政治先決，科學只係附庸，所以誓不封關，亦永不向大陸發出外遊警示。大家亦明知政府無能，撲口罩只能靠民間自救，然後最後疫情減退時特首林鄭月娥會出嚟領功。
明知，但大家冇得選擇。
- - -
同樣地，面對特區政府及香港警察，香港人一樣已經去到冇眼睇嘅地步。印尼女記者被警方射盲眼，警方固然冇當刑事案件處理，循私人訴訟入手，警隊甚至可以拒絕提供開槍警員姓名，阻撓起訴。
警權同法律制度一併成為擁護政權嘅工具，情況滑稽得可笑，但係其實唔好笑。而所謂三權分立嘅另一權，即係立法，亦只不過係政客分配利益嘅場地。
2019 年 11 月區議會選舉，反政府陣營大勝，但只足以凸顯區議會純屬地區諮詢架構嘅角色，以及提供平台畀各路人馬競逐 2020 年立法會換屆嘅議席。
一講到利益，一切就變得好難睇。每四年都嚟一次咁樣樣嘅重複，傳統大黨有傳統大黨聲大大 (對住政府就冇貨賣) ，左膠同一啲藍扮黃嘅人士就各走偏鋒拉散民意，而本土派喺 2016 年於罅隙中脫穎而出嘅後果，就係被 DQ 。
今年，一切都照舊。喺過去九個月抗爭之中犧牲嘅手足，將會淪為政客拉票嘅工具，而政客進入議會之後，手足就會被用完即棄。唔使去到九月，而家我都可以講定畀大家聽，因為人性如此，喺利益之前，註定內鬨、撕裂、一將功成，萬骨枯。
所以大家真係唔好怪賴叔近期少出 post ，多飲酒。每個人都有倦怠期，尤其是當所有新聞都係咁樣循環地 loop 嘅時候，無論係自己吶喊抑或係轉載他人嘅呼籲，效果都會衰退，愈見蒼白無力。
或者有啲讀者唔鍾意睇呢啲放負嘅文章，覺得喺度散佈無力感。 But frankly speaking ，攰，出聲，呻下，唔得架？眼瞓咪打喊路囉，好出奇呀？人心同身體一樣會自動調節，休息夠咗，就重新上路。而我只希望，下一次再起步，係行一條正確嘅路，畢竟人生之中兜過嘅冤枉路，已經夠多。
- - -
想睇更多賴叔時政見聞、金融掃盲及職場文章，請訂閱 Patreon:
https://www.patreon.com/shuklai
#hk #hongkong #patreon #blogger
