【《林祭》／《黑森靈》（The Ritual）：喂你係咪男人嚟架？😏】
之前喺南美旅行，《林祭》當正大片咁宣傳，見imdb評價唔錯，我都好奇係乜戲嚟，但因為搵唔到英文原音版冇睇到，原來已經上架Netflix，前大半段堅係唔錯喎。
《林祭》故事好簡單，講班老死去旅行，途中抄捷徑入個森林，點知賴嘢，喂晨早叫咗你唔好行入森林架喇，出事架嗎？！前大半段因為完全唔知發生緊咩事，而成件事都拍得好Creepy，你以為睇緊《死亡習作》，睇睇又似係《鬼玩人》，定還是《仲夏魘》？
故事好簡單，但因為你唔知發生緊乜事，再加埋「神秘力量」日光日白都可以搞你，加埋《林祭》氣氛營造到家，冇jump scare兼且你咩都睇唔到，都會不寒而慄果隻詭異，個人覺得仲好過唔知有乜咁好睇嘅《死亡習作》。《林祭》都刻劃到森林蕩失路果種無助恐懼、行嚟行去都係同一個位，其實有時可能唔係有嘢搞你，係蕩失路搞到你神智不清，如果你有試過，你會明白，《林祭》係拍得出果種效果嘅。前大半段幾緊張，都令你好想知道發生乜事。
對於一啲淆底獸、儒夫，講就天下無敵做就有心無力嘅男人，大家都會講句「喂你係咪男人嚟架？」有骨氣男人聽到呢句話應該點都會反省，冇骨氣男人可能真係會為保命直認自己唔係男人。雖說男兒膝下有黃金，生死大限當前你跪唔跪？男主角背後個陰霾，令到成件事追看性大增，對一個咁嘅角色有下場，都係估佢唔到嘅。
《林祭》有個好正嘅頭、好爆嘅意念，如果可以一直保持到種氣氛，不難成為新經典，寧願唔好畫公仔畫出腸。結局無啦啦講得太白，原來同你諗嘅完全係另一回事，係一直維持到緊張效果，但睇完會反咗白眼，又係咁典型結局完。
留意返，套戲叫《林祭》唔係林奠，我初頭真係一眼睇錯，大吉利是咩。
📣即訂Patreon加強版，閱讀更多精選深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
