OT猝死後（下）
上集：https://bit.ly/3kxj6f6
因為迷茫，因為渴望俾人記得，我加入咗由季大哥帶領嘅厲鬼團體。
每晚，我哋都會由季大哥帶領，一齊出動，搵個人嚟騷擾，然後輪流講自己個名。
今晚就輪到我講自己個名，我對住呢個喺床角瑟縮嘅女仔，大叫「我係陳大文」。
「陳大文......陳大文！啊！」佢用張被蓋住自己個頭，不斷尖叫。
我知道，我個名已經被佢記住，將會出現喺佢每一夜嘅惡夢中。
但隨之而來嘅，係深深嘅空虛。
作為一隻厲鬼而被記起，根本唔係我嘅夢想。
我最初嘅夢想係......我諗咗好耐先記得，係令個世界變得更好。
只係長大後，因為生活，我漸漸變成咗社會嘅一個齒輪。
冇咗夢想，我先會空虛到，將自己嘅滿足感，寄託喺其他人記唔記得我度。
今日，我就要重拾自己嘅夢想。
但一隻鬼，可以有咩夢想呢？
我望一望周圍，每隻鬼都做出猙獰嘅表情，但神情多數有幾分勉強。
「你係咪好唔想做？」我細細聲問隔離隻鬼。
佢答：「我都唔明，點解要人記得，一定要嚇人......幫人唔得㗎咩？」
「我唔介意嚇人，但我想嚇我女神多啲。」另一隻鬼插嘴。
我意識到，每一隻鬼都有自己嘅願望。
咁我嘅夢想，一於就係幫大家實現願望啦！
於是，我動員團中唔想嚇人嘅鬼，離開季大哥嘅團體，搞咗一個「願望成真豪華團」，群策群力，一齊幫對方實現願望。
有人想追生前嘅女神，有人想幫家人實現願望，有人想報仇......
漸漸地，我哋呢個團喺陰間打響咗名堂，好多鬼都嚟搵我哋幫手。
我哋唔好意思拒絕，但個個都幫又幫唔切，班兄弟都唔想做免費勞工，所以我哋就開始收錢。
收錢就要有人計數，數目要分明，又要有唔同部門，咁就要請更多員工，仲要擴張，咁大間公司要有規有矩......
「願望成真豪華團」，冇幾耐就變成「願望成真有限公司」。
公司愈嚟愈有規模，我都成為陰間有名嘅商家，好滿意依加嘅生活。
人可以實現夢想，唔駛日復一日咁重覆沉悶嘅生活，真係好開心啊。
直到有一日，我喺公司，見到好多隻男鬼，對住部電腦埋頭苦幹。
我本來都冇在意，公司日日都係咁㗎啦，但當我路過茶水間，我聽到一隻鬼喺度講：「日日都係咁樣返工，好悶囉。」
另一隻鬼答：「唉，返工就係咁㗎啦，唔通仲有時間畀你講夢想咩？」
佢哋兩個都好頹，有住無神嘅雙眼，同深深嘅黑眼圈。
嗰一刻，我幾乎以為自己返咗陽間，見到以前日日OT，冇晒夢想嘅自己。
我忽然發現，去到今時今日，我自己實現咗夢想，我哋幫好多顧客實現夢想，但同時，都磨滅咗好多員工嘅夢想。
點解有咁多人會為咗現實，冇咗夢想？
所謂「現實」，其實就係更有錢嘅人嘅夢想。
結果，我哋犧牲夢想，成就其他人嘅夢想。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #OT猝死後
願望成真有限公司 在 Make-A-Wish Hong Kong 願望成真基金 - Facebook 的推薦與評價
Make-A-Wish Hong Kong 願望成真基金， 香港。 9343 個讚· 218 人正在談論這個· 75 個打卡次。幫助香港和澳門患有重病的兒童實現願望，請捐款支持我們! ... <看更多>