販賣慈善（下）
上集：http://bit.ly/3rB3LgZ
網民都好憤怒，喺大家嘅支持下，Johnny將Kate告上法庭！
法庭證實，Kate自己佔用咗大部份嘅善款。
Kate同男友即刻反擊，話Johnny係一個小偷，平時會偷佢哋嘅錢去吸毒。
佢哋畀咗十幾萬Johnny，但Johnny唔夠一個星期就駛晒啲錢。
Johnny否認晒呢啲指控，並且要求Kate還番晒啲錢。
我就覺得，無論Johnny有冇吸毒，呢啲善款都係屬於Johnny嘅。
而Kate就出大絕，直情話，自己已經用晒啲錢。
律師同警方展開調查，研究咁大筆錢到底駛咗去邊。
我信心滿滿，相信法律一定會幫Johnny討回公道！
點知，警方喺Kate嘅手機裡面發現咗一條短訊：「好啦，幫我入油係假嘅，但流浪漢係真嘅。只有咁講，先可以激起大家嘅同情心。」
咩叫「幫我入油係假」？唔通成件事都係一個騙局？咁Kate同Johnny係咩關係？
檢察官繼續調查，發現呢個故事，居然由頭到尾都係假嘅。
Kate根本冇揸車揸到冇油，Johnny都冇用晒身上嘅錢幫Kate入油。
Johnny的確係一個流浪漢，嗰陣Kate喺條街度遇到佢，同情佢，於是畀咗食物同幾十蚊佢，兩個人仲影咗張合照。
但後來，Kate喺Johnny個FB度，睇到Johnny幾年前，曾經幫助過一個車冇油嘅女人，呢個Post當時冇受到關注。
於是，Kate同Johnny商量，話要作個故仔去籌款，一齊分錢。
初時嘅籌款目標係十萬蚊，諗住一人五萬。
但佢哋估唔到，呢個故事會籌到幾百萬。
Kate俾呢個金額動搖咗，佢想剩係分五萬蚊畀Johnny，Johnny梗係唔制，佢哋就嘈起上嚟。
結果，由於錢都掌握喺Kate手上，所以Johnny都分唔到幾多錢。
咁Kate駛咗啲錢去邊？
剩係喺賭場都輸咗幾十萬，之後買車、買珠寶、買奢侈品，駛埋剩低嗰啲。
總之，一蚊都冇拎過嚟幫人。
而Johnny拎到嗰十幾萬，都係揮霍咗。
Johnny雖然成功證明，Kate係侵吞咗佢嘅善款。
但結果，Johnny、Kate同男友都被控欺詐罪，一旦罪名成立，起碼都要判五年。
雖然善款已經被揮霍晒，但籌款網站決定拎番同樣金額出嚟，退番晒畀捐款者。
即係話，我嗰幾百蚊都會退番畀我。
雖然冇蝕到錢，但我一啲都唔開心，我嘅善心俾人利用咗、糟蹋咗。
但仔細諗一諗，Kate同Johnny真係徹徹底底嘅衰人咩？
Kate曾經幫過陌生嘅流浪漢，所以先識到Johnny。
Johnny曾經幫過架車冇油嘅陌生女人，所以先會諗到呢個故仔。
佢哋兩個因為曾經做過好事，所以先有機會做壞事。
大部份人都係普通人，佢哋願意付出少少，幫助陷入困境嘅人。
但面臨巨大嘅誘惑，又會放棄自己嘅道德底線。
—完—
真人真事改編自Kate McClure於GoFundMe為流浪漢Johnny Bobbitt Jr.籌款一案。
各大媒體爭相報導，1萬4千人參與捐款，籌款額達到40多萬美元。
Johnny控訴Kate侵吞了屬於他的善款，但最後發現，這是一場合謀詐騙。
他們被控詐騙及盜竊。
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #販賣慈善
