《年齡》
♀：喂喂，今日我想講年齡，乜年齡真係咁重要咩？十個有九個頭幾句就問我幾歲
♂：我應該係剩低個位
♀：無錯，所以你依家仲存在，其他已經比我delete晒
♂：其實年齡可以代表好多野，知道你幾歲已經可以作出唔少推斷，所以想知都唔係一件怪事
♀：先唔講女人年齡係秘密先，同埋我求其講個假年齡比佢地知，但我講出黎，真係可以了解到我幾多野？嘿，我唔信囉。
♂：一個愈普通既人，就可以從年齡上推斷出愈多，人群都係用平均值去計算，如果你咁有信心你就算比人知道年齡都唔會了解你太多，咁你一定係極端例子
♀：你可以試下估既，我比三次機會你，錯左就唔會再答
♂：好，我保留呢個權利先，依家我估真係斷估，我唔喜歡做無把握既事
♀：你唔似係咁謹慎既人，我仲諗住可以一野打沉你……
♂：我仲有好多野你估我唔到，其實年齡真係一個相對概念，而唔係絕對概念，人平均有六七十歲命，狗平均得十幾歲命，人既十歲同狗既十歲，但都係十年時間，兩種時間既概念係完全唔同
♀：狗十歲都差唔多係人既六十歲喇……
♂：成蟲既雄蚊只有七至十日命，雌蚊有一至兩個月壽命，蜻蜓都係昆蟲，但佢有半年左右壽命，你知唔知蚊一日有幾忙，因為佢活得比人少，所以佢做既野要比人多，先可以活得精彩
♀：我覺得人最大問題都係壽命太長，覺得自己仲有好多時間可以揮霍，所以去到發現無時間先後悔
♂：如果一個植物人佢沉睡左十年，只一個正常人活左十年，雖然佢地都係同一個年齡，但你覺得可以預計到佢地係個點既人咩？
♀：我見過太多，雖然成26歲都成個16歲咁既人，又有班雖然得20歲，但比30歲仲成熟
♂：如果呢個世界上講公平，我諗只係得時間係公平，每個人既24小時都係一樣，你有錢唔會多左時間，你無錢又唔會少左
♀：唔係咁講，有錢用可以用錢去買時間，令自己唔駛做討厭既事，無謂既事，但窮人就難以避免
♂：係既，但有錢人用錢買到自己空餘既時間都好，佢地都係得一樣既時間去做自己喜歡既事，唔會多過窮人，所以我覺得時間係「相對」公平既野
♀：我從來唔信公平，當你係得益者你就唔會認為公平係好事，既然呢件事係唔同立場有唔同睇法，公平只係一種得到利益既手段
♂：呢個係好題目，但離題喇，所以要了解一個人，特別係唔平凡既人，你用年齡去睇，只會得出錯既判斷，如果我可以好簡單咁就估得出你年齡的話，你係我心目中既分數肯定大打折扣
♀：你個人都幾無禮貌，無端端就係心中幫我打分數
♂：任何人都會有評審標準，我用分數去形容，你都有，你用有冇問年齡去判斷，大家都係做緊差唔多既事，如果我無禮貌，你都係一樣
♀：講返年齡，不如你又比我估下你幾多歲
♂：可以啊，都係三次機會
♀：估中有冇獎？
♂：你有我咪有
♀：咁你想要咩獎？
♂：唔……我估中個陣，你想比咩獎勵我咪咩獎勵，獎勵呢樣野，應該係比獎既人用黎評價呢個挑戰係有幾值得
♀：就咁決定，邊個估中，對方就要比一個相應既獎勵對方
♂：暫時我估你同我差唔多大，或者你大過我
♀：哈，唔好嘗試套我口風，我無咁蠢
♂：你都幾聰明
♀：還好，我對自己都幾有信心
♂：我喜歡聰明既人
♀：喂，又乘機同我表白，咩料啊你
♂：唔……阿媽係女人，唔等於女人係阿媽……
♀：基本邏輯我都識，但剛好你讚完我聰明，然後就話喜歡聰明，即係將我放入左你喜歡既可能名單入面，唔好同我玩文字遊戲，呢種擦邊球，大家心照啦
♂：我只係講出基本邏輯，無否認過你講既野
♀：好，聽日又到你諗題目，希望會令我有驚喜
♂：睇黎你又要訓，我會諗，放心，包你有驚喜，晚安�
♀：晚安
—————-
長傾·不見@筆友
https://bit.ly/LongchatEP1
長傾·不見@緣份
https://bit.ly/LongchatEP2
當你沉睡時評價 在 [心得] 當你沉睡時完結雜感- 看板KoreaDrama - 批踢踢實業坊 的推薦與評價