Jenny嘅童年，並唔係充滿考試同測驗，而係一套又一套卡通片，不論係最女仔歡迎嘅《美少女戰士》、《唱K小魚仙》，定還是係男仔心頭好嘅《足球小將》同《機動戰士》，佢全部都可以將對白倒背如流，從頭到尾一字不漏。
當所有同學仔嘅「我的志願」唔係填醫生律師，就係嗰期TVB播緊咩職業嘅電視劇就填咩職業時，Jenny好肯定咁填上──配音員。
雖然話職業無分貴賤，但係就有分難易，講緊嘅唔係工作內容，而係入行嘅機會。
配音員同編劇一樣，行內成日話求才若渴，但就係唔知點解好多有志寫作或配音嘅人都搵唔到機會入行，呢種資源錯配嘅原因，同尼斯湖究竟有冇水怪、華富邨究竟有冇UFO、港鐵可加可減機制究竟幾時先會有得減一樣，係一個謎。
但係Jenny接觸多咗配音業界嘅人同事之後，開始歸納出少少頭緒。喺香港配音嘅工作並唔算多，加上電視台又有屬於自己嘅配音班底，而且通常會要求配音員一人分飾多角，就算係動畫片最陣容鼎盛嘅暑假檔期，近年都興用明星班底配音，喺僧多粥少嘅情況下，要入行就難上加難。
Jenny有試過參加不同嘅配音訓練班，除咗想精進自己嘅技藝，更加希望可以擴闊人脈，果然佢偶爾都可以因為領班介紹，得到一啲小角色，例如係主角班上嘅同學，可以講一句「早晨！」，又或者係過場嘅餐廳侍應講句「請問要食啲乜？」
但Jenny仍然好珍惜每次機會，佢為咗保持把聲有最佳表現，唔煙唔酒當然不在話下，煎炸嘢同香辣嘢佢都全部戒晒，有時同朋友出嚟食飯，佢簡直清心寡慾到好似一個出家人咁，令到朋友好冇癮。
唔止生活習慣，Jenny仲一路打住散工維持生計，方便一有機會就去跟班，就算係做小角色都好，佢都一定會喺屋企練習不同方式嘅演繹，希望累積更多演出經驗。
冇一份穩定嘅職業，屋企人自然會有微言。有一次媽咪同佢講：「早知你細個嗰時就唔畀你睇咁多卡通片，我情願你睇完《烈火雄心》之後想去做消防員，又或者係睇《妙手仁心》，唔做醫生，都至少去做個護士吖。」
Jenny只係拎咗兩張戲飛出嚟同媽咪講：「我做消防員你可唔可以睇我入場救火吖？我做醫生你想唔想入手術室睇我割人哋嘅肝呀腎呀咁吖？但我做配音可以請你同阿爸嚟睇戲喎。」
由於係暑假檔期，幾乎全個戲院都係父母帶住小朋友入場，Jenny好鍾意呢種氣氛，令佢錯覺自己都好似仲未跌入名為「成長」嘅陷阱一樣。
「你個角色叫咩名話？」阿爸臨開場前，笨拙地將3D眼鏡戴喺老花鏡前面，個樣顯得有啲滑稽，但Jenny笑唔出，因為佢突然發覺：原來個角色連名都冇。
「Shu～唔好嘈啦，開場喇！」口硬心軟嘅媽咪好緊張咁講。
電影完場之後，小朋友嘻嘻哈哈咁離開戲院，Jenny同爸爸媽媽粒聲唔出，行到出戲院大堂，媽咪企喺電影海報前面，哄埋去仔細咁睇上面嗰一大堆卡通角色，然後問：「阿女，你係唔係做呢隻松鼠？」Jenny搖搖頭。
阿爸托一托老花眼鏡話：「梗係唔係啦，阿女係嗰隻兔仔嘛！」
Jenny苦笑話：「我都唔喺張海報上面。」
頭一次，Jenny開始懷疑，如果自己堅持喺呢條路走落去，到底可以走得幾遠。
＊＊＊
Jenny覺得世界上最支持佢嘅人，唔係屋企人，唔係朋友，而係陪咗佢十一年嘅貓貓阿七。好多個夜闌人靜嘅晚上，Jenny匿喺房反覆咁練習同一句對白時，只有阿七做佢唯一嘅聽眾。
但係寵物嘅時間，比人類流失得更快。年老體弱嘅阿七時不時進出寵物醫院，唔計各種各樣嘅檢查費用，單單係每次嘅留院費已經造成Jenny極大負擔。望住本來已經捉襟見肘嘅銀行存款跌至前所未有嘅新低，Jenny終於不得不向現實低頭，或者，「我的志願」從來只係一個俗濫嘅作文題目，有幸能夠貫徹目標嘅人，由始至終都係極小數。
喺朋友介紹下，Jenny去咗一間後期製作公司全職工作，佢成日都會模仿唔同經典卡通角色嘅說話去回應同事，成為咗Office嘅開心果，有次有個同事就同佢講：「喂Jenny，你扮聲咁勁，唔做配音員真係嘥晒！」
當晚Jenny返到屋企，望住堆滿成間房嘅動畫DVD，佢發現，原來自己真係唔想放棄做配音員呢個志願。
但係配音員呢個身份係由邊個定義？到底要演繹過咩角色、要得到過幾多掌聲先配得上呢個稱謂？
Jenny拎起書櫃上佢最鍾意嘅一本書《天地一沙鷗》，呢本書係講一隻叫Jonathan嘅海鷗，佢天性特立獨行，不甘飛翔術只係用於執麵包碎，頂多捕捉一啲小蝦小魚填飽肚子。為咗鍛鍊飛翔嘅技藝，體驗遨翔的愉悅，佢不但承受其他海鷗嘅冷言冷語，更選擇離群遠飛，歷盡洗練後，終於領會到飛翔嘅真義。
Jenny用佢自己嘅方式，將故事由佢一個人重新聲演，錄音完成之後，Jenny配上自己簡單嘅手繪圖畫，然後upload到YouTube。
網絡世界每一日都出現不同驚喜，當有人用嘩眾取寵嘅方式務求獲得十五分鐘成名，亦有人真誠懇切地表現自己。Jenny嘅配音版《天地一沙鷗》大受歡迎，好多素未謀面嘅人，透過Jenny嘅聲音，搵到追求理想嘅勇氣。
Jenny繼續隱身喺幕後為不同嘅故事配音，有啲有志寫作但入行無門嘅人將自己嘅故事交畀Jenny聲演，故事爆紅之後更被出版社爭相搶購版權。
而Jenny喺自己嘅Channel簡介上面，簡簡單單寫咗三個字──配音員。
＊＊＊
故事啟發自Gin Lee新歌《天地一沙鷗》，呢本書曾經啟發過無數咁多人，鼓勵大家要勇於追求夢想。聽返Gin Lee之前另外兩首派台歌《很堅強》同《自我感覺還好》，主角由自我懷疑，到經歷身心磨練，然後到呢首《天地一沙鷗》，走出comfort zone尋找人生意義，彷彿就係一個完整嘅人生三部曲。
「你有成就自我的自由，沒有甚麼事物可以阻擋你。」
《天地一沙鷗》MV: https://youtu.be/ftI3b-HQtBs
消防員卡通片 在 寶寶巴士- 中文兒歌童謠- 卡通動畫- 消防車, Fire Truck - YouTube 的推薦與評價
職業變變變-勇敢的 消防員 奇奇 | 職業認知| 消防車, Fire Truck | 中文兒歌| 童謠| 卡通, 動畫| 寶寶巴士| Nursery Rhymes | BabyBus. ... <看更多>