好人一生平安
對唔住，我今日未能出席 7.1 遊行，因為我琴晚 6 月 30 被捕，今日出返嚟 😅 由偽黃至真黃又邁進一步啦 😂😂 想返屋企沖涼訓覺，所以保釋後就冇參與 😢（其實都唔係好黃姐 😂）今次呢件事我好感恩，好慶幸我冇穿冇爛出返嚟，好安全，警員都對我好友善，冇兇我，只係笑下寸下我姐。好慶幸我戴 con，因為羈留係唔戴得眼鏡。好慶幸我冇嚟 m，羈留個洗手間確實係冇得洗手。好慶幸我係 6 月 30 號 23:00 前被捕，同七一後分別好大... 總之我好安全，大家唔使擔心我，好抱歉要咁多人擔心，我都冇諗過會有咁多人關心我 😭
6 月 30 嗰日工作好忙，唔係好跟得切啲新聞，ot 完就仆過去，我只想珍惜最後一次做讀旗手嘅機會，我本身諗住舉到刊憲為止 😂😂 不過大概十五分鐘就被捕啦 😂 其實都有做過心理準備嘅，大概知流程係點，之前朋友被捕，幫過手都有啲理解，所以有心理準備，個人就定啲。同埋之前都俾晒屋企人 contact 俾同行嘅朋友、熟嘅朋友、成日密切留意 tg 消息嘅朋友，所以一被捕，屋企人好快就知，呢啲準備功夫大家都可以做。
但我做漏咗樣嘢，就係只背咗星火電話，落口供之前我可以打俾律師，可惜星火冇聽/打唔通，可能佢哋忙，兩次都揾唔到，我又冇嘢講，所以就落咗口供。呼籲一下大家背定多幾個電話啦。同埋屋企人攞衫過嚟，記得提佢哋攞冇繩嘅大褸，其實羽絨都 ok，最好長身啲可以當被蓋。同埋帶長褲就最好啦，裙會腳凍。
之前幻想過被捕過程，我覺得我平時劣食都 ok，又去到邊都好易訓著，有時坐商場都訓得著，入到去都應該好易適應 😂 其實裡面啲飯都唔難食嘅，如果係自由情況下，我都應該覺得 ok 嘅，不過嗰刻冇胃口，其實就算再好食嘅嘢，都唔會有胃口覺得好好食。But 杯凍紅茶幾好飲嘅 😂😂 我入到羈留室就即刻諗盡辦法入睡，但佢個 setting 係預人坐，個位比較窄，我諗大概 50 cm 啦，所以攤喺到都好難訓著 😂 轉換好多姿勢先淺睡到，我諗有老師喺隔敵講書我會易好多訓 😂😂
其實由細到大都冇諗過自己同被捕坐監有咩關係，自小四起，喺林鄭母校年年考全班頭三名，dse 六科 30 分考入科大，有個 sem 僥幸有 Dean’s list，死儲錢 23 歲買樓（雖然後來俾 ex 同佢新女友霸咗😂），自學電腦嘢做 technical 位，雖然唔算係成功，我識嘅人大部分都叻我好多，但確實反送中前完全唔會覺得自己會同被捕扯上關係。我連功課都唔識抄，又唔會借功課俾人抄嗰啲 😂😂 但生於呢個世代，愛香港，就會係咁樣，好多香港人都付出呢個代價，甚至犧牲比我多好多。
好多謝我男朋友唔食晚飯等到凌晨四點先買包食，好多謝我屋企人等我，擔心我，好多謝咁多位朋友同 fb page 讀者關心。我唔知之後係咪會落 charge 告我未經許可的集結，唔知日後會點，希望一切順利平安，平常心去面對啦。今日感覺發生好多新聞，未得閒睇，但願各位手足平安，71 後真係比我大獲好多。如果我再被捕，就冇得保釋，國安法應該直落終身監禁，呢樣我會 keep in mind，但我個心唔會變，相信大家都一樣，大家加油。
btw 如果想多啲手足了解被捕準備，歡迎 cls... 呢個只係我個人經歷，近萬被捕手足之中，我係非常幸運嘅一個 😞
.
💛 IG : cyubi_network
.
#呀粗 #超必網絡 #CyubiNetwork
