【你識屙屎嗎？】
細個嘅時候每次屙屎都好大陣仗，我會擔張櫈仔入去，然後呢我畫畫嗰本簿，拎埋支筆，或者我要睇嘅雜誌；好似趕去班房上堂咁行入廁所（但講緊當時我未開始返學，根本唔會有一個概念叫做拎啲書入班房😂)
跟住我就會坐上馬桶，揭開本畫簿，一邊畫畫一邊屙屎。唔好問我搞咁多嘢點解篤屎仲未走，或者究竟要屙幾耐，就係因為呢個習慣，我自細就覺得屙屎係一件好嚴重嘅事，佢分分鐘要十幾廿分鐘，所以細個唔會響條街屙屎，因為一來以前啲廁所好恐怖，二來就係都冇得畫公仔，我點屙屎？
人越大越要掌握咩叫做時機。
飲完杯咖啡啱啱急屎，如果人在銅鑼灣，會知道去邊幾個廁所最安全。尖沙咀我都有選擇，但去到旺角呢啲地方我根本唔會飲咖啡😂嗱，屎呢樣嘢留响身體其實冇意義，佢係meant to leave。而時機呢樣嘢仲吊詭，因為唔係你話見到有個廁所好乾淨可以屙屎，你舊屎就會出現；而當你急嘅時候，又唔等於附近會有廁所。咁如果你覺得返屋企先可以去廁所嘅話，你就會錯過一次又一次嘅時機，明明係最適合嘅時候應該放佢走，但係你偏偏留住佢。返到屋企佢已經唔係最當造嗰舊屎。
細個嘅時候搞咁大場龍鳳就係為咗去廁所，甚至以為咁樣嘅狀況之下先至可以屙屎。後來發現只要急而你又有去得嘅廁所，及時放手先至係最爽嘅事情。每次都覺得感謝天主，有咩好得過呢件事要放低嘅一刻，你放低到！又放低咗。
由秋分當日我個腦入邊就有一場又一場嘅戰爭，到最後估唔到透過屙屎參透咗少少人生。
