【估你唔到！#自拍意外 竟然年輕男子佔多】
出遊時，睇見優美嘅風景，好多人會「#攝影師」上身，除咗將景色影低作記錄外，同時都想 #自拍 selfie一番，放上社交平台 #打卡 炫耀，兼為自己踏足此地作證。為咗影到靚相，#構圖 不被人群破壞，就算明知危險，都不惜一切，挑戰極限。結果稍一不慎，發生意外。外國傳媒報道，早幾日 #泰國 #蘇梅島 發生咗一宗自拍身亡意外。大家自拍時，就算興奮，都要顧及自身安全呀！
同一地點屢生意外
講番呢宗意外，據悉死者係一名33歲 #法國 男子，佢去蘇梅鳥旅遊，事發地點係 #納芒2號瀑布（Na Mueang 2）。#納芒瀑布 係蘇梅島著名嘅 #景點，瀑布隱藏喺茂密嘅叢林裡，流水潺潺，雖然景色唔算係好壯觀，但都令人讚歎佢朋友話佢本來想喺瀑布旁邊selfie，點知唔小心跣腳滑倒，跌咗落瀑布。當地警方表示，由於瀑布地理陡峭又滑，救援人員要用上好幾個鐘先可以將呢名遊客嘅遺體吊番去地面。原來同一地點，幾個月前都有一名 #西班牙 籍遊客因自拍而墜下喪生。意外一而再發生，當地人員已經將事發地點用繩圍起嚟，並且拉起警告banner，提醒遊人唔好攀爬走近，免生意外。
#印度 最多人因自拍死亡
自從手機成為隨身物，而且手機嘅相機鏡頭不斷改進，自拍成為好多人嘅生活日常。出遊時，喺異國風光嘅引誘下，就算平時唔鍾意影相嘅人，都唔執輸自拍一番，留個記念。世界各地不時發生因自拍而意外死亡事件。2018年，印度發表一項研究，從2011年至2017年，全世界約有259人喺自拍時死亡，死者平均年齡為23歲，當中7成係男性。發生自拍意外而死亡嘅人數最多係印度，其次係俄羅斯、美國和巴基斯坦。死亡事件中，意外類型最多係溺水，另外交通事故和由高處墜下都常發生。
多地禁 #自拍神棍
自拍唔小心除咗可能成意外，亦會為其他人帶來麻煩。例如自拍時有人會用自拍神棍，諗住將部相機伸遠啲，角度攞寬啲，唔使影出「大頭照」。不過你一伸棍，佔用空間就大咗，如果旅遊點好熱門，人多擠迫，神棍真係好擾民。所以，近年多個旅遊熱點、大型活動、公共交通運輸等都明文禁止遊客使用神棍，例如 #JR西 #日本嘅 #京都、#大阪、#神戶 站等；#日本迪士尼樂園、#台灣 四大博物館及美術館、#英國 #溫布萊球場、#美國 國家美術館、#新加坡 #聖陶沙、#意大利 #羅馬鬥獸場、#法國 #羅浮宮等。
=====================⠀⠀⠀⠀
立即讚好 Like Magazine HK | 每日送上優質生活Tips
【Follow IG】http://instagr.am/likemagazinehk
