Search
Hotel Icon榴槤甜品一向好出名，今次因爲有3款沙巴產的野生榴槤紅寶石、黃小花及鹹蛋黃（名都未聽過🤭）製作全新榴槤甜品🤤🤤🤤，就即時約左朋友去食呢個tea buffet🍰🥧🍨🍮
一開始食少少熱食，第2輪已經係甜品，因為無乜人爭住🤣
榴槤咖央牛油多士、榴槤杏仁酥、炸榴槤、榴槤奶凍、榴槤卷蛋，個多士🍞係超級無敵霹靂好食🤩🤩
仲有啖啖榴槤肉既奶凍，伯爵茶同綠茶都係推介👍🏻，其他味我好想試但好飽😂。
至於咸食都有長腳蟹、蝦等凍盤，有片皮鴨、pizza、炸物、花雕蛋白蒸龍脷柳😋等等，個冬蔭公湯底麵都唔錯，不過又係勁飽無食到🤷🏻♀️
放假同朋友食下野吹下水真係唔錯，不過得2個鐘唔夠喉🤪🤪
#hotelicon #teabuffethk #durian
#原來我仲有好多野未試晒
好多朋友都問我，如果想緊湊啲玩新加坡嘅景點，有無乜野好介紹？ 今日就同大家推介呢個三小時用腳行盡新加坡嘅路線啦！
今日就會同大家喺三個鐘入面，行晒魚尾獅、Fullerton Hotel、Marina Bay Sands同埋Gardens by the Bay幾個景點，而且仲會同唔同嘅角度睇到新加坡濱海一帶嘅優美景色。首先我哋要搭地鐵紅線或者綠線，去到Raffles Place站，搵H出口 / Merlion Park，上到地面之後，轉右，去到海邊再轉右，見到前面嘅古老建築物就啱喇！呢度就係 The Fullerton Hotel喇！噫！停一停先！千祈唔好錯過呢個檔口，佢係新加坡其中一款地道甜品 - 雪糕三文治！ 一睇咁多人排隊就知要試啦！ 用麵包夾住又厚又硬嘅冰凍雪糕，唔知你又試過未呢？
食完甜品，未去到魚尾獅之前，就不如入一入呢間超五星酒店 The Fullerton Hotel過一過冷河先喇！原來呢度係新加坡以前嘅郵政總局。嚟到就梗係要睇睇呢度嘅歷史啦！原來喺大堂落一層，就搵到呢個介紹前呢度歷史嘅展廳，睇下！同香港回歸前嘅郵筒一樣樣架！仲可以寫封信寄番俾自己… 不過記住… 要貼郵票俾錢架！
過完冷河，之後出嚟就要過橋喇！過到一半，點解見到咁多人影相嘅？ 嘩！有人跳海呀！
其實要影到我後面呢個跳海公仔靚嘅話，當然就要搵多個朋友喺對面岸影啦，不過如果你無嘅話，拎支自拍棍好似我宜家咁呢，都算係一個唔係好差嘅選擇嚟嘅，三、二、一、笑！
影完相就要行快兩步過橋喇，如果唔係太陽都就快落山喇！過到橋，就會見到呢個文化味好重嘅地方！呢度就係Victoria Theatre & Concert Hall！停步影幾張相，感受一下文化氣息之後，跟住搵呢條隧道，之後過橋，再向前行，大約三至五分鐘，就嚟到呢個世界聞名嘅景點 - 魚尾獅喇！呢度除咗可以睇到背後繁華嘅商業區之外，另一邊又可以見到Marina Bay Sands嘅宏偉建築，絕對係一個值得留影嘅地方！
原來我身後面呢座魚尾獅1972年已經係新加坡嘅旅遊標誌嚟，不過呢個位置就係2002年配合旅遊區發展先至搬嚟。
望去另一邊 - 噫，點解有個榴槤咁樣嘅建築？ 原來呢度就係新加坡嘅濱海藝術中心！影張相，之後就向呢個榴槤進發喇！呢條Jubilee Bridge為行人接通咗魚尾獅同埋濱海藝術中心，亦都可以見到新加坡政府為發展旅遊業所花嘅心思。5分鐘左右就嚟到呢邊喇，遠望番頭先身處嘅魚尾獅同埋商業區，又係另一個唔可以唔影嘅靚景！
好多朋友都問我點樣可以用最靚嘅方法影到金沙酒店嘅全景，咁梗係唔係去到金沙酒店旁邊啦，喺呢個歌劇院對出嘅海濱長廊，就係一個又少人，又易影嘅地方喇！好似我宜家後面咁，你話幾靚！
好啦，唔好掛住影相喇！小休一陣之後，就繼續向前進發！行完呢條海濱長廊之後，就會嚟到呢個好似看台咁嘅地方！究竟呢度係乜嚟？原來每年9月，呢度會係一年一度嘅賽車大賽看台，而平日亦會用嚟做軍隊畢業典禮嘅看台架！
大約10分鐘左右，我哋就開始上橋，準備去 Marina Bay Sands嘅方向喇！Marina Bay Sands集酒店、商場、展覽中心同埋賭場於一身，亦係新加坡嘅地標之一，唔只外形靚，頂樓仲係一個無邊際泳池！橋嘅另一邊就係Marina Bay Sands嘅商場入口，等我哋參觀一下呢個商場先啦！
快行完商場，我哋就跟住 Gardens By the Bay牌，向呢個景點進發。一路沿路行，再穿過 Marina Bay Sands酒店，再推門，就嚟到Gardens by the Bay! 等我哋一齊睇下呢度嘅靚景啦！
呢個門口開得咁神秘，究竟入邊有啲乜嘢好嘢食呢？芝麻開門！
台灣出名食麻辣火鍋就人人都知，近年仲要興起吃到飽嘅潮流，五六百蚊台幣任飲任食包甜品，你都咪話唔抵喎。不過今日介紹呢間麻辣火鍋就係逐碟計嘅，有乜咁特別？依家就同大家睇吓！
今日我就揀咗個鴛鴦鍋底，一邊係傳統嘅麻辣，而另外一邊就係昆布清湯底。湯底嚟到我就見到麻辣鍋個邊已經有大大嚿嘅鴨血。同出邊可以加鴨血唔同，呢度嘅鴨血好矜貴，一人都係得兩舊嘅咋！
話咁快就食得喇！首先睇吓呢碟台灣本地溫體雪花牛啊！乜嘢係溫體牛呢？原來溫體牛通常係喺深夜屠宰，朝早就可以拎出嚟市場賣，完全冇經過冷凍或者冷藏，肉質鮮嫩又多汁！睇吓我啲碟溫體牛先！係唔係見到都想食呢！原來食溫體牛都有特別嘅方法個喎，鍾意食生啲嘅朋友可以將片牛肉放喺碗入邊，再落啲滾嘅湯將牛肉輕輕灼吓，跟住就食得喇！提提你喇！呢度只有特定日子有溫體牛賣，記得打電話嚟訂咗先有得食架！
不過總有朋友好似我咁唔食牛，嚟到呢度一樣有好嘢食！跟住落嚟要介紹嘅，就係西班牙伊比利豬梅花 (Iberian Pork)。伊比利豬因為有嚴格嘅飼養同埋運送過程，係唯一可以唔使熟曬都食得嘅豬肉，我就鍾意淥到啱啱轉色嘅九分熟，保留豬肉嘅香味同埋嫩滑度，真係好食到不得了。
嚟到麻神最出名嘅當然係溫體牛同埋伊必利豬，不過另外一樣野個個都知道嚟到呢度係限量食嘅就係我手上呢舊鴨血喇。好多人都話鴨血喺其他麻辣火鍋係任加，點解呢度咁矜貴呢？矜貴就矜貴在呢，呢度係用刀叉食架！切落去成舊鴨血你會見到唔會散，嘩...... 擺落個口係彈牙、仲要非常香，冇血腥味，咁靚嘅鴨血，我咁大個仔呢，次次都係要嚟呢度先食到嘅。正。
呢杯初戀貴妃分子飲都係麻神嘅特選推介，新鮮嘅檸檬汁配搭蜂蜜再加入分子荔枝喺你口裏面爆開，口感特別之餘都可以消濟開胃㗎！呢度樣樣野都咁新鮮，睇吓啲蝦同埋帶子！仲有火鍋必備嘅菜籃、餃子、同埋各款肉丸等等...... 咦點解有煲嘅？原來呢煲係麻辣豬大腸，上碟嘅時候已經熱辣辣，當你等緊湯底滾嘅時候，已經可以食住等！
到飲飽食醉嘅時候，點解會叫即食麵呢？你唔好多手自己走去淥喎，等我搵個服務員嚟先，跟住佢就會將兩個即食麵放入麻辣湯底，煮大約兩至三分鐘，跟住夾起啲麵，加入辣油、香油撈一撈，再加入蔥花就搞掂晒。睇我食得咁滋味，就知道呢碗吸收咗成個火鍋精華嘅即食麵有幾好食同入味啦！
麻神喺地鐵綠色線台北小巨蛋站附近，最後入座時間去到晚上12點，夜咗想食一樣冇問題啦！
麻神麻辣火鍋
地址｜台北市松山區南京東路五段8號3樓
交通｜捷運南京三民站步行10分鐘
電話｜(02)2749-2508
營業時間｜上午11:30-14:30、下午17:00-23:30
線上訂位｜https://reserve.toreta.in/spicygod/#/
《第107故事分享及哈佛知識分享(足本)》第一次全家分享故事: 當神仙遇上凡人
聖誕及新年假期，我第一次全家為你送上故事祝福。
.... 從前有個神仙，希望親自完成凡間每一個人嘅願望。 有日佢化身做了個凡人，遇上不同路人的經歷 .... 你又會是那個路人呢? 這個故事理念有沒有科學根據？ 根據哈佛心理學教授Daniel Gilbert 指出....
......
.
.
.
故事全文:
《第107故事分享及哈佛知識分享(足本)》第一次全家分享故事: 當神仙遇上凡人
從前有個神仙，希望親自完成凡間每一個人嘅願望。 有日佢化身做了個凡人...
係路上遇到一個丈夫係度喊: 「 我老婆啱啱患咗重病過身，我人生無晒意義，以後日子點過? 」
神仙就問呀丈夫: 「咁我有咩可以幫到你，完成你嘅心願?」
「我想要返我老婆!」
「 ok，無問題！」
就係咁， 阿老婆就喺阿丈夫面前返生。 大家互相擁抱，丈夫好開心!
「多謝恩人，多謝恩人」
行多一陣，佢喺路上又遇到另一個乞兒。 乞衣好可憐咁， 不斷叩頭，跪喺個地下道乞錢。 佢又問阿乞兒:
「我有咩可以幫到你，完成你嘅心願?」
「我淨係想乞夠一千蚊， 咁我就成年都唔使捱餓啦!」
「 ok，無問題!」
就係咁， 乞兒就袋咗張一千蚊， 佢從來未見過一千蚊係咩樣，佢拿出嚟又聞又望，越聞就越開心。
「多謝恩人，多謝恩人」
再行多一陣，佢喺路上又遇到另一個單眼海盜 ，雖然佢已經上曬岸，重歸正途， 佢始終好懷念以前兩隻眼睇野嘅世界:
「我有咩可以幫到你，完成你嘅心願?」
「如果我可以有返兩隻眼睇野， 咁我就咩金銀珠寶都可以唔要喇。」
「 ok，無問題!」
就係咁，又搞惦咗!
「多謝恩人，多謝恩人」
神仙覺得原來滿足人嘅心願係咁容易，佢就開始沾沾自喜。 直至遇到下一個路人。
佢英明神武，有錢有勢，有老婆有父母有仔女，乜嘢都有，可惜日子就係過得唔快樂。神仙又問佢:
「我咩人都可以完成佢嘅心願，我有乜可以幫到你?」
「我想要幸福!」
「 ok，無問題!」
老婆父母仔女係晒佢身邊，一家人食飯，個個都好關心佢。
佢無晒表情，話「哦，咁就叫幸福啦!」
神仙覺得佢未感受到幸福，就再試下!
好多金銀珠寶就係佢面前出現。
「哦，咁就叫幸福啦!」
神仙再試下!
把佢變得更加高大威猛， 肌肉紮實， 連個鼻都長高咗半吋!
照照塊鏡，「哦，OK!」 依然面目無情。佢話:「睇嚟，你呢個所謂嘅神仙都係無用㗎啦!」
神仙聽後好嬲， 一怒之下就決定懲罰佢，變走曬佢嘅財富，健康同親人。瞬眼間佢變成個乞兒， 跛下跛下，自己孤伶伶咁喺條街度乞食。
過兩日，神仙啖氣過咗，冷靜下來就對自己之前無理懲罰人嘅行為有啲內疚，就決定回去探下個人點。
「你仲問我點? 我而家乜都冇曬啦! 你走把啦!」
神仙見佢咁慘， 就決定將佢變走咗嘅嘢，變返晒畀佢。
從此，佢又再次英明神武，有錢有勢，有老婆有父母有仔女，仲有多咗樣嘢，就係...
(他多了樣什麼?)
「多謝恩人，多謝恩人，我終於知道咩叫做 ...... 幸福啦!」
故事帶出乜嘢理念?
做人，最好嘅 , 就係 Live in the Present (活在當下). 最好嘅嘢已經係你身邊， 你好好珍惜/享受的話，我相信凡事都會變得更好。
其實唔單只我相信，根據哈佛心理學教授 Daniel Gilbert 係2010年做咗個研究，佢搵咗2200 個人參加實驗，用咗一個 iphone app 叫做 "trackyourhappiness" ，係不定期嘅時間聯絡嗰班人，問佢哋 (1) how are feeling? 100分就代表最開心，0分就代表最唔開心。(2) what are you doing? 你做緊乜嘢? 同埋 (3) are you thinking about something other than what you are currently doing? 你係唔係諗緊啲其他嘢?
目的就係睇佢哋做緊啲嘢，同諗嘅嘢，係咪一致/集中，抑或唔同， 即係代表個腦係道「遊緊魂」"Mind Wandering". 如果遊緊魂嘅話會再問佢，你係
(1) 諗緊啲唔開心嘅嘢 unpleasant mind wandering，或
(2) 諗緊啲中性嘅嘢 neutral mind wandering, 定
(3) 諗緊啲開心嘅嘢 pleasant mind wandering
研究結果顯示， 人有平均47%嘅時間個腦係喺道「遊緊魂」Mind Wandering， 即係做緊嘅嘢同諗緊嘅嘢唔一致。 問佢哋開唔開心嘅話就發覺， 從統計學角度 multilevel regression 指出，越遊魂嘅人就越唔開心，越集中一致做緊嘅嘅人就越開心。
睇下呢個圖， 左邊代表唔開心，右邊代表開心。 越大個波，代表sample size越大，即係越多人回覆。 中間嗰條一點點嘅綫，就代表平均值。研究發現:
(1) Unpleasant mind wandering 佔所有25萬個回覆嘅12.5%, 係令人最唔開心，開心指數只有42分。
(2) Neutral mind wandering 佔14.5%，有62分。
(3) Pleasant mind wandering 排第二開心，佔19.9%，有69分
(4) 最開心嘅，就係 Not mind wandering, 佔53.1%，有71分
即係話即使你個腦係諗緊啲開心嘢，都唔夠你個腦集中注意力喺依家做緊嘅嘢開心。 點解? 就係因為你專注，先至能夠 apprepriate 真正地感受到嗰一刻嘅 touch and feel，而嗰一刻係最直接有機會能夠令你最開心。 即是我睇舖，都經常合埋隻眼去 feel 間舖! Really!
想睇佢哋做緊Present啲咩嘢，再睇埋上半part 個圖。最唔開心，就係休息或者返緊工嘅時候。最開心? 就係傾計，做運動，同埋make babies 嘅時候，你明我意思啦。
最好嘅 Present, 就係 Live in the Present 係有科學根據㗎！ 最好嘅嘢已在身邊，想幸福? 你依家又唸緊啲乜呢?
