＜＜２０１７新世代好工準則＞＞
今日係年初五，相信今日大部份人都要返工喇，窮生係度祝大家開工大吉！新一年步步高陞，發過豬頭！又過完年喇！代表咩呀？就係過左年又到一年一度打工仔轉工既旺季！由２月到７月都會上演你打我份工，我打你份工既交換西工無聊黑色喜劇。大家除左因為而家份工受氣，轉左工之後想人工高Ｄ之外，到底有Ｄ乜野因素令你比個Like自己份工?HR評打工仔就睇得多，今次要由打工仔評下2017年既今日，點先叫做一份好工！
好工不能困身
今時今日好多人份工都係無償OT，有返工冇放工。人一日就得２４小時，訓左６－７個鍾，份工如果食左你成１０－１２個鐘，你真正做自己野既時間有幾多？而且比起要時間黎做自己想做既野，香港後生仔更需要多Ｄ時間去諗自己想做Ｄ咩野！衰Ｄ講我而家窮，我都要時間諗下點樣可以改善生活啦係咪？
返工反而與社會脫節？
窮生之前都講過，份工人工可以underpay，但如果份工唔可以上網/同人溝通，就高一倍人工都唔會考慮。因為以前ｄ人話唔做野會同社會脫節，而家如果返工返到與社會脫節，長遠黎講削弱左自己既競爭力，而家係資訊既年代，掌握資訊就有可能性，你日日做做做，社會進左步你都唔知，到時臨老俾人淘汰就喊都無謂。
出唔起高人工，請讓我在外發展
而家以經唔係７０－８０年代一份工打一世既年代，人力市場明買明賣。打工仔同公司既關係只係錢同技術/人力既交易。公司覺得冇責任養你一定，打工仔亦無必要只忠於一主。生意難做，我理解公司有難處，但如果你俾唔起高人工，容許我出去搵外快，更加收入，對你同我都好，你多個人用，我多個避風港，ｗｉｎｗｉｎ！
讓員工了解自己做緊乜，唔做啤膠工人
呢個係好多港資公司/大公司既通病，亦都係員工冇心機做野既原因。就係自己日日返工都唔知到底自己係做左ｄ乜野實際既野出黎。如果員工可以了解多ｄ自己既工作成果，成功感自然會大ｄ，對公司歸屬感又高ｄ。係工作過程中因為了解左成個工序又可以同多ｄ唔同部門既人溝通合作，可以宏觀地學習企係經營者角度出發。可以有機會企係管理者角度睇公司，係一個好好既學習機會，日後創業就靠呢ｄ野嫁喇！
彈性上班減少等待
某d工種如果唔係一定要係預定時間出現係工作崗位的話，好多事一早返到咁office都係等人交野先可以開工，根本冇必要日日返９放６，有時未必日日返黎９個鐘都有野做。如果公司可以定到每周返工的時數，再以工作的成效黎評估返員工表示。可以更有效運用勞動力得黎又令員工有更大自由度控制自己的作息時間，自然可以留得住人才。因為其實你出得月薪，就唔好覺得我坐得係Office就係做緊公司野，稍為有打過工既人都唔會咁諗啦，只要我可以完全公司交俾我既task，我係中間處理緊d咩，只要唔犯法，你又做咩要管住我呢？
所以窮生認為，2017年再講好工，應該係講自由度，發展空間都唔需要局限係公司之內。公司應該鼓勵員工有多方面發展，培養員工更宏觀去處理公司同自己既問題。聰明既員工係會明白果３幾千蚊人工既多少，同自己日後既發展邊樣重要ｄ，想公司走得到去下一個新世代，唔一定係諗放下生日假，搞下speeddating既！仲有好多人性化，生活化既方法可以用。，只要你多ｄ企係員工角度諗，呢個世界就唔需要咁多周綺萍。
