【一個人帶娃的苦笑，上集】
#深情文 #長文慎入 #找共鳴
前日同林小姐食緊麥當勞，然後佢突然間話想去廁所，呢個時候我就變得好煩惱，站響人生交叉點，完全唔識抉擇❗❓可能你會問究竟有啲乜嘢需要決定呢? 去廁所咋嘛，好簡單好基本嘅要求啫， 但如果你係 #一個人帶娃 ，事情就變得冇咁簡單喇， 究竟我應該。。。
1️⃣將枱面嘅食物全部打包帶埋去廁所? 但，哪有手拎?
2️⃣勇敢放手一搏帶佢去廁所之後返嚟繼續食? 怕唔怕畀人收咗?
3️⃣ 叫佢忍住唔好痾，最壞打算係瀨尿? 最後係咪要我抹地?
。。。。 無論邊一個選擇都會有取捨， 無論邊一個抉擇我心入面嗰句都係，#如果多一個人喺度就好啦。
好多全職媽媽大部分時間都係自己一個湊小朋友，而我面對早出晚歸爸爸、零後援、零抖氣位嘅現實， 每日24小時當中幾乎有20小時係我同佢單打獨鬥！ 識我嘅人都知道，我幾乎任何時候都帶著林小姐， 當中嘅辛酸真係有血有淚， 但又唔知點解咁好笑！
｛最難熬的，手抱期｝
未識企、未識坐、唔可以直抱、唔可以用孭帶。。。「那時候，我練成咗單手神功， 如果唔係我覺得我應該會陣亡。」
#去廁所
每次單拖同bb出街，遇到一個最大嘅難題，一定係去廁所， 好彩的話你可以搵到一個有換片板嘅殘厠， 唔好彩嘅你只能夠單手抱住佢， 再坐無影凳。。。 可以幻想到個情景有幾咁狼狽。當時，我買咗一個神器可以幫助我企喺度都去咗廁所添，我都覺得自己好瘋狂。
#去醫院
我自己試過要入急症，無可奈何都要一齊去（爸爸出咗trip添啊! ），林小仲響急症室玩到好開心，啲人問我小朋友病都咁精神，well，病果個係我.... 然後就有人問，點解要帶埋小朋友黎，心中OS:唔帶係咪放響你屋企先? 是咁的，媽媽們係無資格病的，留醫更免問。 ♡感恩果次雖然事出突然，契媽及好友們都表示可相助，心頭一暖!
#去餐廳
單拖絕對唔能夠去自助取餐嘅餐廳，一系列快餐，想都別想， 因為你既冇手攞餐盤，又唔可以去攞位先，簡單黎講就係完全唔work!
#搭van仔
其實手抱bb坐bb車出入係比手抱方便， 但又唔係每個地方都好方便bb車， 如果你要單手抱住一個bb，再收起bb車上車落車，其實都幾危險， 尤其初生bb車摺極都係好大架!
#搭巴士
你以為搭巴士會比較容易啲咩? 我話畀你聽我係超級地獄黑仔王， 每次帶bb車上巴士一定會遇到輪椅， 然後你只要無奈抱住個bb再去摺返架車，然後都唔知可以點。。。 重點係你以為個個巴士司機會停車畀你慢慢搞咩?哈哈。。。
#剪頭髮、睇牙醫
話說其實我呢兩年半都冇去過髮型屋剪頭髮，或者睇牙醫，其實你覺得有人會俾你抱住個bb剪頭髮咩? 有牙醫會畀你抱住個bb整牙咩? 有時你估唔到生活上咁簡單嘅活動都做唔到， 唔好再諗去咩整指甲做facial啦。
#綁鞋帶
響街甩咗鞋帶你諗住綁? 唔好太天真呀，哪有手，那時候的我，絕對係唔著綁帶鞋出街，甩咗真係唔知點算。
#倒垃圾
話說我屋企個垃圾房係響出面嘅， 要倒垃就要開門出去， 人生交叉點又黎啦，究竟應該將個bb放喺屋企出去定係抱埋佢去呢， 呢個係我到而家都冇答案嘅...
#跑步
其實生左林小姐之後我係冇跑過步，抱住佢跑步會唔會搞到腦震盪㗎? 放佢響bb車上推住跑步咁刺激? 唔好講跑步啦其實兩年半年我都冇做過運動。。。
#放狗
識我嘅朋友都知我經常性一拖二， 但其實米哥好慘㗎因為我抱住個妹， 唔可以再同佢瘋狂跑步追逐， 又唔可以玩掉水樽， 行又行得慢過人。。。
#影相
最遺憾就係冇合照， 就算見到啲好靚嘅景相同佢影返張靚相， 都只能夠自拍，下下大頭相，就係咁囉，習慣就好!
#沖涼
或者你要等小朋友瞓咗可以偷雞去沖涼， 或者你可以選擇帶埋佢入去沖涼， 或者呢一切其實只係個機緣巧合， 嗰日能唔能夠有機會咁啱畀你把握到時機去沖涼， 講彩數嘅啫。 #利申 我一直都係同個女一齊沖涼嘅， 我都好懷念自己一個人沖涼嘅感覺。
#煮飯
基本上我都唔會煮一啲步驟太複雜嘅菜式， 因為你唔知幾時會出現狀況，要立即放低手頭上嘅野去處理， 試過煎緊條魚行一行開好快就燶曬， 有試過過度發酵麵團， 結果唔食得， 經常發生白忙一場嘅效果。 所以我最鍾意就係蒸嘅同燉嘢..
｛後話｝單打湊小朋友， 我冇諗過會遇到咁多荒唐嘅困難， 有啲好微小嘅願望原來都變得咁奢侈， 但有正正真實咁樣發生緊， 唔需要好偉大先做到媽媽， 但做咗媽媽你就必須要變得強大， 包括心理質素， 其實兩年半唔剪頭髮都冇乜嘢呀， 唔好再問我點解留到啲頭髮咁長啦。。。哈哈，貪靚囉。
註: 由於林小姐當時滿月後每隔日都要返醫院做物理治療， 路程需要轉兩架van仔， 而且逗留響街嘅時間長至七小時， 所以。。。
#下集再續 #mrs1amology #mamablogger #全職媽媽 #misslam #全職bb #單打媽 #零支援 #零假期 #24hrsStandBy #其實成日想寫心情文
倒甲急症 在 信健康我患上急性甲溝炎嗎？... - CUHK Medical Centre 的推薦與評價
現在天氣乾燥，甲褶皮膚乾裂蹺起了片片的表皮，形成倒刺，而急性甲溝炎最常見的誘因便是拔倒刺所致。喜歡咬指甲、吮手指、搣手指皮、經常用清潔劑洗手、 ... ... <看更多>