關於 你們才是香港人的真正天使 ，我們在網路上蒐集到這些相關的討論、資訊與評價

「#感謝醫護人員」
飲酒影響前列腺影響腎臟影響泌尿道

醫護人員，永遠都是自己最尊敬的行業。每次有親友因病進院，步出醫院之際，都好想大力感激所有醫護人員盡心盡力的幫忙。

今次想多謝嘅係聯合醫院嘅泌尿科同X光組嘅醫護人員。

我有位親人，年紀大，沒不良嗜好，就是喜歡飲啤酒。一天可以飲十幾廿罐啤酒，當水飲，面不改容。

當我細路女，我講到口乾，聽唔入耳。無尿酸高無脂肪肝，佢當自己過咗關。

點知有日，做恒常健康檢查，發現膀胱唔識排尿，有約兩罐汽水的尿在膀胱，但沒有急尿的感覺。醫生怕有事，放尿後，插尿喉兩星期，再番醫院做測試。

當時護士在電話跟我說:「如果兩星期後測試正常，可以拔尿喉；如果到時測試仍然不理想，谷了在膀胱但沒有感覺，咁就應該要長期繼續插了喉啦。」要我和親人有定心理準備。

我解釋情況，苦苦哀求呢段時間唔好飲酒啦，一揹尿袋，真係一世㗎。。。

到昨天，是檢查日子，我向公司請了假，在X光房苦等。到X光房門打開，見到親人步出，然後有醫護陪伴在側行出來，那一刻，我好像看到天使光。

到護士宣布，親人幸運地狀態良好，可以重新排尿，不需繼續插尿喉，我和親人都大大鬆口氣，齊齊90度彎腰感謝，估唔到佢哋同樣彎腰回謝。一時間好似變成日劇咁。

我問親人呢段時間有無戒酒，佢有啲唔好意思，話：「第一日仲有飲，因為雪櫃仲有兩罐啤酒，之後就冇飲，同時因為插尿喉，其實因為真係好唔舒服，真係唔想往後嘅日子都係咁，所以真係冇再飲。」

臨走前，護士問我，其實我係唔係同行？我汗顏話，其實我只係營養師，不過講唔聽我親人。佢露出大大嘅會心微笑，幫我大力提多幾句，飲酒只能淺酌，唔好當水飲等等。。。
真係佢講一句，好過我講十句。

回程坐小巴時，我同親人講：「生命有Take Two，你真是一個十分幸運且幸福的人，真的要好好珍惜今次可以重拾健康的機會。」

#感謝全港所有醫護人員
#你們才是香港人的真正天使，

#唔好問佢係邊位
#佢千祈唔好見到呢個Post
#寫佢私隱佢會嬲

（借位一用） 衷心感謝所有醫護人員

非常重要的親人離開了，今天是第七天，不捨的心情非三言兩語能形容。今次是想借個位向九龍醫院醫護人員表達謝意。

我這位親人生命力十分頑強，由只吊鹽水吸氧氣的情况下也撐了十天，醫護們全天候輪流入來監察生命儀器。
醫護准我每天入單獨房間探望。有晚情況嚴重，我通宵留守，其間有醫護見我凍，倒杯暖水給我；又有醫護知我留夜，再給我多張長椅和禦寒衣物；亦有醫護怕房間太冷清，整夜開住電視新聞台，同一段新聞應該播了數十次。

每一位醫護都非常友善和溫暖，對於面對臨終親人的訪客來說，是十分重要的安慰。

在我留夜那一晚，有位護士入來，可能見我太悲傷，開口和我閒聊一下：

護士：「咦，想問吓，你個名最後一個字，多唔多人讀錯呀？」
我：「？都唔多嘅，不過如果就咁講我個名就無人無諗起呢個字囉，通常會以為係李幸如 (其實我係叫李杏榆)。」
護士：「其實我個仔都係呢個榆字，比較少人用，見你都係呢個榆，好奇問吓。」
我：「吓，呢個榆並非常用字，點解你會幫你個仔用呢個榆字嘅？」
護士：「咁你知唔知個榆字點解？」
我：「我有查過，就係榆樹囉。我就係唔明，做咩改我個名係棵樹吖？！」
護士：「唔係吖，我覺得好好喎，榆樹，係適應力和生命力好強嘅植物，我都想我個仔好似咁喎。」

「杏」，可能指杏林，我依家都係做緊同醫學相關的工作；
「榆」，可能指榆樹，係對我的期望和祝福。

在親人彌留期間，才突然感到，我的名字與命運，原來從名字一早已經透露了。

而我的名字，正是這位親人托一位算命先生改的。

特別感謝這位護士，為我解開名字之迷，祝你兒子也像榆樹一樣，有強大的適應力和生命力。

而最後，希望此刻有真正的天使伴您身傍。。。

#感謝全港所有醫護人員
#你們才是香港人的真正天使

#營養師 #Nutritionist #AnnieLee